ឃាត់ខ្លួនជនសង្ស័យ២នាក់រួមជាមួយគ្រឿងញៀនជាង ១០០ក្រាម

(ខេត្ដកំពត)៖ កម្លាំងនគរបាលការិយាល័យប្រឆាំងបទល្មើស នៃស្នងការដ្ឋានខេត្តកំពត បានឃាត់ខ្លួនជនសង្ស័យ ២នាក់ ជាមួយនិងគ្រឿងញៀនទម្ងន់ជាង១០០ក្រាម។

ប្រតិបត្តិការនេះបានធ្វើឡើងកាលពីព្រឹកថ្ងៃទី១៦ ខែតុលា ឆ្នាំ២០២២ ក្នុងភូមិសាស្ត្រស្រុកឈូក ខេត្តកំពត​ ។

មន្ត្រីនគរបាលប្រឆាំងបទល្មើសគ្រឿងញៀនបានប្រាប់ឱ្យដឹងថា ជនសង្ស័យក្នុងករណីខាងលើ រួមមាន៖ ១. ឈ្មោះ អ៊ុច កំសាន្ត ហៅដូង ភេទប្រុស អាយុ ៣៨ឆ្នាំ រស់នៅភូមិត្រពាំងធំ ឃុំត្រពាំងធំ ស្រុកទឹកឈូ ខេត្តកំពត។ ២. ឈ្មោះ ងឹម ជ្រឿន ភេទប្រុស អាយុ ២៦ឆ្នាំ រស់នៅភូមិស្រែលាវ ឃុំត្រពាំងភ្លាំង ស្រុកឈូក ខេត្តកំពត។

មន្ត្រីនគរបាលដដែលបានបន្តឱ្យដឹងបន្ថែមទៀតថា កាលពីវេលាម៉ោង១១ និង ៣០នាទី ព្រឹកថ្ងៃទី១៦ ខែតុលា ឆ្នាំ២០២២ ខណ:កំពុងចុះល្បាតក្នុងភូមិដុំផ្តៅ ឃុំត្រពាំងភ្លាំង ស្រុកឈូក សមត្ថកិច្ចបានប្រទះឃើញមនុស្ស ២នាក់គួរឱ្យសង្ស័យ។ ស្របពេលនោះ សម្ត្ថកិច្ចក៏បានចុះសាកសួរ និងធ្វើការឆែកឆេរស្រាប់តែប្រទះឃើញគ្រឿងញៀនចំនួន ៩កញ្ចប់ ដែលមានទម្ងន់ ១០៤,២៧ក្រាម(មួយរយបួនក្រាម)។

មន្ត្រីនគរបាលបានបន្តថា ជាមួយភស្តុតាងទាំងនេះ កម្លាំងល្បាតក៏សម្រេចឃាត់ខ្លួនជនសង្ស័យទាំង២នាក់ រួចបញ្ជូនមកកាន់ស្នងការដ្ឋានខេត្តកំពតដើម្បីបន្តដំណើរការតាមនីតិវិធី៕