(ខេត្ដកំពង់ចាម)៖ មានសេចក្ដីរាយការណ៍មកថា មានករណីល្បែងសុីសងបញ្ជល់មាន់ និង វង់អាប៉ោង កំពុងបើកលេងក្នុងចម្ការចេក យ៉ាងពពាក់ពពូន នៅក្នុងភូមិទួលថ្ម ឃុំថ្មពូន ស្រុកព្រៃឈរ ខេត្ដកំពង់ចាម។
ពលរដ្ឋលើកឡើងថាល្បែងស៊ីសងខុសច្បាប់ កើតឡើងយ៉ាងរាលដាលបែរជាមន្ត្រីអាជ្ញាធរ និងសមត្ថកិច្ចពាក់ពន្ធ័ថ្នាក់ឃុំ ថ្នាក់ស្រុក បែរជាសម្ងំស្ងាត់ឈឹង ហើយអ្នកញៀនល្បែងបានចូលរួមលេងល្បែង យ៉ាងគគ្រឹងគគ្រេង។
មេល្បែងស៊ីសងខុសច្បាប់ត្រូវបានគេស្គាល់ថា៖ឈ្មោះ ម៉ៅ និងអ្នកមើលផ្លូវ(កាងល្បែង) បានអួតអាងប្រាប់ក្រុមអ្នកញៀនល្បែងឲ្យមានទំនុកចិត្តថា ពួកគេរត់ការគ្រប់លំដាប់ថ្នាក់អស់ហើយដូច្នេះគ្មានសមត្ថកិច្ចណាចុះមកបង្ក្រាបឡើយ។
ពលរដ្ឋក្នុងភូមិទួលថ្ម ឃុំថ្មពូន ស្រុកព្រៃឈរ បានលើកឡើងបន្តថា ក្នុងចម្ការចេកមួយកន្លែងមានគេបើកសង្វៀនបញ្ជល់មាន់ និងវង់អាប៉ោងដំណើរការយ៉ាងរលូន ហើយមានអ្នកចូលរួមលេងល្បែងយ៉ាងកុះកររាល់ថ្ងៃ សមត្ថកិច្ចពាក់ព័ន្ធ សម្ងំទទួលលាភសក្ការះ ជាថ្នូរមិនបង្ក្រាប ដោយបើកជាង១ខែហើយឬមួយលោកអធិការមើលមិនឃើញ។
ពលរដ្ឋមានការសង្ស័យថា លោកនាយប៉ុស្តិ៍នគរបាលរដ្ឋបាលឃុំថ្មពូន និងលោក កែវ ស៊ាងហ៊ាន់ អធិការនគរបាលស្រុកព្រៃឈរ ព្រមទាំងអភិបាលស្រុកព្រៃឈរ មិនចាត់វិធានការបង្ក្រាបល្បែងស៊ីសងខុសច្បាប់ ដើម្បីពង្រឹងសន្តិសុខសង្គមននោះទេឬមួយខ្លាចបែកឆ្នាំងបាយ។
បញ្ហានេះកំពុងធ្វើឲ្យប្រជាពលរដ្ឋព្រួយបារម្ភយ៉ាងខ្លាំងពីបញ្ហាអសន្តិសុខសង្គម ព្រោះអំពើចោរកម្ម និងបទល្មើសផ្សេងៗកើតឡើងគួរឲ្យភ័យខ្លាចគឺផ្ដើមចេញពីល្បែងបញ្ជាល់មាន់ និងវង់អាប៉ាងទាំងនោះ។
ដោយសារព្រួយបារម្ភពីបញ្ហាអសន្តិសុខសង្គម ទើបប្រជាពលរដ្ឋអំពាវនាវឲ្យលោកឧត្ដមសេនីយ៍ទោ ឯម កុសល ស្នងការនគរបាលខេត្តកំពង់ចាម ចាត់វិធានការបង្ក្រាបល្បែងស៊ីសងនៅភូមិទួលថ្ម ឃុំថ្មពូន ផងដើម្បីឲ្យស្របតាមគោលនយោបាយភូមិ សង្កាត់ មានសុវត្ថិភាពទាំង៧ ចំណុចរបស់រាជរដ្ឋាភិបាលដែលបានដាក់ចេញក៍ដូចជាសេចក្ដីណែនាំរបស់ក្រសួងសុខាភិបាលផងដែរ។
អង្គភាពយើងនឹងផ្សាយជាបន្តបន្ទាប់ទៀត ប្រសិនបើមានការពន្យល់បកស្រាយ ពីអាជ្ញាធរ និង សមត្ថកិច្ច ឬសាម៉ីភាគីពាក់ទាំងអស់ ជុំវិញក្តីព្រួយបារម្ភ និងការលើកឡើងពីសំណាក់ប្រជាពរដ្ឋ នូវការបើកបនល្បែងស៊ីសងខាងលើ៕
