(ភ្នំពេញ)៖ ស្ត្រីម្នាក់យំលែងចេញ ខណៈកំពុងអង្គុយហូបបបរនៅលេីបង់សួនច្បារមាត់ទន្លេ ត្រូវជនសង្ស័យមកលួចកាបូបយកទៅបាត់ ដោយក្នុងនោះមានលុយប្រាក់ខែទេីបបេីក និងលុយគេផ្ញេីមួយចំនួនទៀត បង្កការភ្ញាក់ផ្អើលដល់បងប្អូនប្រជាពលរដ្ឋទាំងយប់ និងជួយជូនទៅដាក់ពាក្យបណ្ដឹងនៅប៉ុស្តិ៍ផងដែរ។
ហេតុការណ៍នេះកេីតឡេីងកាលពីវេលាម៉ោង០០និង៣០នាទីយប់រំលងអធ្រាត្រ ឈានចូលថ្ងៃទី១៣ ខែកុម្ភៈ ឆ្នាំ២០២២នេះ នៅចំណុចមាត់ទន្លេ ទល់មុខកាហ្វេអាម៉ាហ៊្សូន (ជិតព្រះបរមរាជវាំង) ផ្លូវស៊ីសុវត្ថិ សង្កាត់ជ័យជំនះ ខណ្ឌដូនពេញ។
បេីតាមសម្ដីជនរងគ្រោះសុំមិនបញ្ចេញឈ្មោះបានរៀបរាប់ប្រាប់អ្នកយកព័ត៌មានយេីងថា នៅមុនពេលកើតហេតុ រូបនាងជិះម៉ូតូមួយគ្រឿង ម៉ាក Suzuki Let’s ពណ៍ស ពាក់ស្លាកលេខកណ្ដាល 1Y-8700 ចេញពីធ្វេីការ និងបានមកអង្គុយជជែកគ្នាលេង នៅសួនច្បារមាត់ទន្លេកន្លែងកេីតហេតុខាងលេី ជាមួយបុរសស្ត្រី២នាក់ទៀតដែលជាអ្នករាប់អានគ្នា ខណៈពេលនោះរូបនាងបានទិញបបរមកហូប និងបានទុកកាបូបស្ពាយនៅក្បែរខ្លួន មួយសន្ទុះក្រោយមក ស្រាប់តែអ្នកលក់ភេសជ្ជៈនៅក្បែរនោះស្រែកសួរគាត់ថា “មានបាត់សម្ភារៈអ្វីទេ ? គាត់ឃេីញបុរសម្នាក់ឈ្មោះ “ញាញ់” រត់កាត់មុខគាត់ ឆ្លងផ្លូវគេចខ្លួនបាត់ទៅហេីយ ដោយឃេីញមានទឹកមុខគួរឲ្យសង្ស័យ និងកាន់កាបូបស្ពាយ ពណ៌ខ្មៅនៅជាប់ដៃផងដែរ“ ទេីបគាត់មកសួរនាំ។ លឺដូច្នេះទេីបរូបនាងដឹងថា កាបូបដែលទុកនៅក្បែរខ្លួននោះ ត្រូវបានជនមិនស្គាល់មុខមកលួចយកទៅបាត់ ដោយរូបនាងមិនបានដឹងខ្លួនបន្តិចសោះ ធ្វេីឲ្យរូបនាងស្រឡាំងកាំងយំលែងចេញ ព្រោះក្នុងកាបូបស្ពាយនោះ មានលុយទេីបបេីកប្រាក់ខែ និងលុយមួយចំនួនទៀតជារបស់អ្នកធ្វេីការជាមួយផ្ញេីរូបនាងទុកអោយសិន សរុបជិត៥០០ដុល្លារ និងខ្សែចង្កេះ១ខ្សែ ធ្វេីពីប្រាក់តម្លៃជាង១០០ដុល្លារ រួមទាំងកាតចាក់វ៉ាក់សាំង។
ប្រភពព័ត៌មានពីកន្លែងកេីតហេតុបានឲ្យដឹងថា បន្ទាប់ពីកេីតមានជនសង្ស័យលួចកាបូបនោះរត់គេចខ្លួនបាត់មួយសន្ទុះក្រោយមក បង្កការភ្ញាក់ផ្អើលដឹងដល់បងប្អូនក្រុមអ្នកសារព័ត៌មានពេលយប់ ចុះមកយកព័ត៌មានកន្លែងកេីតហេតុ រួចសួរនាំដំណេីររឿងហេតុ ធ្វេីការផ្សព្វផ្សាយរួចជួយជូនស្ត្រីរងគ្រោះទៅដាក់ពាក្យបណ្ដឹងនៅស្នាក់ការប៉ុស្តិ៍នគរបាលរដ្ឋបាលជ័យជំនះផងដែរ ដេីម្បីឲ្យសមត្ថកិច្ចធ្វេីការស្រាវជ្រាវកំណត់មុខសញ្ញាជនសង្ស័យតាមជំនាញផងដែរ ។ លុះវេលាម៉ោង១២និង១០នាទីយប់រំលងអធ្រាត្រ ឈានចូលថ្ងៃអាទិត្យ ទី១៣ ខែកុម្ភៈ ឆ្នាំ២០២២នេះ ស្រាប់តែមានប្រជាពលរដ្ឋដែលស្គាល់ជនសង្ស័យឈ្មោះ ញាញ់នោះ បានផ្ដល់ដំណឹងមកក្រុមអ្នកសារព័ត៌មានយេីងថា ប្រទះឃេីញបុរសម្នាក់ឈ្មោះ ញាញ់ កំពុងដេីរតាមផ្លូវទាំងប្រញាប់ប្រញាល់ នៅតាមបណ្ដោយផ្លូវលេខ១៥ ក្នុងសង្កាត់ផ្សារកណ្ដាលទី១ ខណ្ឌដូនពេញ ទេីបក្រុមអ្នកសារព័ត៌មាន នាំគ្នាជិះទៅរក ក៏ប្រទះឃេីញហេីយឃាត់សួរនាំសិន ជនសង្ស័យឈ្មោះ ញាញ់ បានឆ្លេីយសារភាពថា ខ្លួនពិតជាបានធ្វេីសកម្មភាពលួចយកកាបូបស្ពាយពណ៍ខ្មៅ របស់ស្ត្រីរងគ្រោះពិតប្រាកដមែន នៅពេលលួចបានរូបគេឆែកឃេីញមាន លុយដុល្លារ២០០$ និងលុយខ្មែរជាង១០ម៉ឺនរៀលប៉ុណ្ណោះ រូបគេបានយកលុយទៅដាក់ចូល Account នៅណេតមួយកន្លែង ដេីម្បីលេងល្បែងភ្នាល់តាមអនឡាញ ក្រែងបានស្រង់ដេីមបានខ្លះ តែបែរជាមិនដូចការគិត ចាក់ភ្នាល់មិនដែលត្រូវ ចាញ់អស់លុយរលីងហេីយ។ ចំណែកឯខ្សែចង្កេះធ្វេីពីប្រាក់នោះ អ្នកស្គាល់គ្នាសុំយកទៅបាត់ហេីយ។
ជនសង្ស័យមានឈ្មោះ ចាន់ ញាញ់ ភេទប្រុស អាយុ៣០ឆ្នាំជាង ជនជាតិខ្មែរ មុខរបរនិងទីលំនៅ មិនពិតប្រាកដ(ដេកលើសួនមាត់ទន្លេ)។
បច្ចុប្បន្នក្រោយពេលក្រុមអ្នកសារព័ត៌មានពេលយប់ ជួយឃាត់ខ្លួនជនសង្ស័យរូបនេះរួចប្រគល់ឲ្យសមត្ថកិច្ចប៉ុស្តិ៍នគរបាលរដ្ឋបាលជ័យជំនះ ធ្វេីការសាកសួរ និងចាត់ការបន្តតាមនីតិវិធី ។
សូមបញ្ជាក់ថា កន្លងមក ជនអនាថាភាគច្រើនដែលជាជនហិតកាវ ញៀនថ្នាំ បាត់បង់សតិ តែងតែបង្កនូវបាតុភាពអនាធិបតេយ្យ អុកឡុក លួចឆក់ និងវាយកំហែងយកទ្រព្យសម្បត្តិពលរដ្ឋ ភ្ញៀវទេសចរដែលមកលម្ហែ និងហាត់ប្រាណតាមសួនច្បារមាត់ទន្លេនោះថែមទៀតផង ប្រជាពលរដ្ឋក៏បានសូមណូមពរដល់សមត្ថកិច្ចឬអាជ្ញាធរមូលដ្ឋានខណ្ឌដូនពេញ មេត្តាជួយល្បាតតាមសួនមាត់ទន្លេឲ្យបានញឹកញ៉ាប់ផង ដេីម្បីការពារសន្តិសុខ សណ្ដាប់ធ្នាប់ជូនពួកគាត់ កុំឲ្យជួបប្រទះមានការព្រួយបារម្ភដូចករណីខាងលេីនេះ៕
