(បន្ទាយមានជ័យ)៖ រថយន្តទំនើបម៉ាកហ្វតបានបើកបុកជាមួយម៉ូតូសណ្តោងរ៉ឺម៉កក្នុងទិសដៅស្របទិសគ្នា បណ្តាលឱ្យខាងរ៉ឺម៉ករងរបួសធ្ងន់ពីរនាក់។
គ្រោះថ្នាក់ចរាចរណ៍ នេះបានកើតឡើងនៅ លើផ្លូវជាតិលេខ៦ស្ថិតនៅភូមិសាលាក្រៅ សង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យកាលពីរសៀលថ្ងៃទី៥ ខែកក្កដា ឆ្នាំ ២០២១។
សមត្ថកិច្ចបានឱ្យដឹងថា គ្រោះថ្នាក់ចរាចរណ៍ រវាងរថយន្តបុកម៉ូតូសណ្តោងរ៉ឺម៉ក ទិសដៅស្របគ្នាបណ្តាលឱ្យអ្នកបើកបរម៉ូតូរបួសធ្ងន់ពីរនាក់ត្រូវបានកម្លាំងនគរបាលដឹកយកទៅសង្គ្រោះនៅមន្ទីពេទ្យបង្អែកក្រុងសិរីសោភ័ណ។ចំពោះមូលហេតុ បណ្តាលមកពី ម៉ូតូសណ្តោងរ៉ឺម៉កប្តូរគន្លងបត់ឆ្វេងខ្វះការប្រុងប្រយ័ត្ន។ ស្របពេលនោះក៏មានរថយន្ត ហ្វត ពាក់ផ្លាកលេខ ភ្នំពេញ 2BK 9507 បើកក្នុងល្បឿនលឿនដល់ផ្លូវបំបែកជាបួនក៏បានបុកម៉ូតូរ៉ឺម៉កពេញទំហឹងតែម្តង។
ចំពោះមធ្យោបាយ ម៉ូតូសណ្តោងរ៉ឺម៉ក និងរថយន្តខូចធ្ងន់ធ្ងរ ត្រូវបានកម្លាំងសមត្ថកិច្ច យកមករក្សាទុកនៅអធិការដ្ឋាននគរបាលក្រុងសិរីសោភ័ណ ដើម្បីដោះស្រាយតាមផ្លូវច្បាប់៕
