ព័ត៌មានជាតិ

អភិបាលខេត្តកំពង់ចាម បញ្ជាឲ្យអាជ្ញាធរ​ ប្រេីគ្រឿងចក្រកាយរំដោះទឹកចេញពីចំណុចលិចលង់ដោយជំនន់ទឹកភ្លៀងនៅ​កំណាត់​ផ្លូវជាតិលេខ៦ និងលេខ៧

(ខេត្ដកំពង់ចាម)៖បន្ទាប់ពី​ភ្លៀង​បាន​បង្អុរ​ជាប់ៗ​គ្នា នា​ប៉ុន្មាន​ថ្ងៃ​កន្លងមកនេះ បានធ្វើ​ឲ្យ​ជន់​លិច​កំណាត់​ផ្លូវជាតិ​លេខ ៦ និង​លេខ ៧ ប្រវែង​ប្រមាណ​ជា ១.០០០​ម៉ែត្រ ស្ថិតនៅ​ចំណុច​ភូមិ​កប្បាស ឃុំ​ខ្វិត​ធំ​ ស្រុក​ព្រៃឈរ ខេត្តកំពង់ចាម បណ្ដាល​ឲ្យ​រំខាន​ដល់​ការធ្វើ​ចរាចរណ៍ ក៏ដូចជា​ការ​រស់នៅ​របស់​ប្រជាពលរដ្ឋ ។ នៅ​ព្រឹក​ថ្ងៃទី​២១ ខែកញ្ញា ឆ្នាំ​២០២១នេះ ឯកឧត្ដម អ៊ុន ចាន់​ដា អភិបាល នៃ​គណៈ​អភិបាល ខេត្តកំពង់ចាម បាន​ដឹកនាំ​មន្ត្រី​​ពាក់ព័ន្ធ​ និង​អាជ្ញាធរ​មូលដ្ឋាន អញ្ជើញ​ចុះ​ពិនិត្យ​ស្ថានភាព​ជាក់ស្ដែង ដើម្បី រក​វិធីសាស្ត្រ ជំលៀស​ទឹក កុំ​ឲ្យ​លិចលង់​បន្តទៀត ដែល​ធ្វើ​ឲ្យ​ខូចខាត ដល់​ហេដ្ឋារចនាសម្ព័ន្ធ និងប៉ះពាល់​ដល់​លំនៅដ្ឋាន របស់​ប្រជាពលរដ្ឋ ផងដែរ ។​

ក្នុងឱកាស​ចុះ​ពិនិត្យ​ដល់ទី​តាំង​ទឹកភ្លៀង​ជន់​លិច​នោះ ឯកឧត្ដម អ៊ុន ចាន់​ដា អភិបាលខេត្ត​កំពង់ចាម បាន​បញ្ជា​ឲ្យ​អាជ្ញាធរ​មូលដ្ឋាន សហការ​ជាមួយ​មន្ទីរជំនាញ យក​គ្រឿងចក្រ​កាយ​ជា​ប្រឡាយ ហេីយដាក់លូរំដោះ​ទឹក​ចេញ ដើម្បីបញ្ចៀស​ការខូចខាត​ដល់ហេដ្ឋារចនាសម្ព័ន្ធ និង​លិច​លង់ដល់​លំនៅដ្ឋាន​ ក៏ដូចជា​ផល​ដំណាំ​របស់​​ប្រជាពលរដ្ឋ ។ ជាមួយ​នោះ រាល់​មធ្យោបាយ​ធ្វើដំណើរ គឺអាច​នៅ​ចរាចរណ៍​បាន​ដដែល ប៉ុន្តែមិន​តម្រូវ​ឲ្យ​បើកបរ​ក្នុង​ល្បឿន​លឿនឡេីយ ហើយក៏​មានការ​សម្រួល​ចរាចរណ៍ ពី​កងកម្លាំង​សមត្ថកិច្ច ផងដែរ ។
គួរ​បញ្ជាក់ផងដែរថា កាលពីល្ងាចថ្ងៃទី២០ កញ្ញា កន្លងទៅនេះ ជំនន់ទឹកភ្លៀងបានជន់លិច ទីតាំងចំនួន ៣កន្លែង គឺ ៖ ១.នៅលើកំណាត់ផ្លូវជាតិលេខ ៦ ស្ថិតនៅក្នុងស្រុកបាធាយ ១កន្លែង ។ ២.នៅលើកំណាត់ផ្លូវជាតិលេខ ៧ ស្ថិតនៅក្នុងឃុំមៀន ស្រុកព្រៃឈរ ១កន្លែង ហើយទីតាំងទាំង ២កន្លែងនេះ ត្រូវបានស្ថាប័នជំនាញ សហការជាមួយអាជ្ញាធរមូលដ្ឋាន កាយជាប្រឡាយរំដោះទឹកចេញពីថ្នល់​រួចរាល់​ហើយ ។ ដោយឡែក កន្លែងទី ៣ គឺនៅចំណុចលើកំណាត់ផ្លូវជាតិ លេខ ៧ ស្ថិតក្នុងឃុំខ្វិតធំ ស្រុកព្រៃឈរ ក៏ព្រោះតែទឹកបានហូរកាត់ថ្នល់ ដែលមានជម្រៅត្រឹមជង្គង់នោះ ៕

adm

Leave a Reply

Your email address will not be published. Required fields are marked *