(ខេត្តស្វាយរៀង)៖ ហេតុការណ៍មួយបង្កឲ្យភ្ញាក់ផ្អើលដល់ពលរដ្ឋរស់នៅក្នុងឃុំដូង ស្រុករមាសហែក នាំគ្នាផ្អើលចោមរោមមើលរថយន្តដឹកដី ធ្លាក់ត្រពាំងស្លា ខណៈកូនទៅរៀនជួសជុលរថយន្តនៅភ្នំពេញ ទុកឡាននៅផ្ទះហើយឪពុកទាញឡានមករៀន បើកក៏ជ្រុលធ្លាក់ត្រពាំងតែម្តងទៅ ប៉ុន្តែសំណាងល្អអ្នកបើករថយន្តស្ទុះចេញពីរថយន្តទាន់កុំអីមិនដឹងថាទៅជាយ៉ាងណានោះទេ។
ករណីនេះខាងលើនេះ បានកើតឡើងកាលពីវេលាល្ងាចម៉ោង៤ៈ០០នាទី ថ្ងៃទី៩ ខែឆ្នូ ឆ្នាំ២០២១ ស្ថិតក្នុងភូមិត្រពាំងស្លា ឃុំដូង ស្រុក រមាសហែក ខេត្តស្វាយរៀង។
បើតាមពលរដ្ឋរស់នៅម្តុំកន្លែងកើតហេតុបានឲ្យដឹងថា៖ នៅម៉ោងកើតហេតុខាងលើ គេឃើញបុរសម្នាក់ឈ្មោះ សូ ស៊ុត ភេទប្រុស ៥៣ឆ្នាំ មានទីលំនៅភូមិឃុំកើតហេតុខាងលើ បានបើករថយន្តដឹកដីប្រភេទ ១តោនកន្លះ បើកបរពីកើតមកលិច។
ប្រភពបានបន្តទៀតថា៖ លុះមកដល់ចំណុចដីភូមិរបស់គាត់ ដែលមានត្រពាំង(ឈ្មោះត្រពាំងស្លា) នោះក៏ជាន់ប្រាំងមិនសុី រថយន្តនៅតែទៅមុខរហូត ធ្លាក់ចូលក្នុងត្រពាំងតែម្តង។
ក្រោយពីរថយន្តធ្លាក់ចូលត្រពាំងរួចមក ម្ចាស់រថយន្តបានហៅ អេសកាវ៉ាទ័រ មកទាញយករថយន្តពីក្នុងត្រពាំង ដើម្បីយកទៅជួសជុលដោយខ្លួនឯង៕
