(ខេត្ដព្រះវិហារ)៖ អង្គភាពទីបញ្ជាការ កងពលធំអន្តរាគមន៍លេខ៣, លេខ៩, លេខ១២៨, និងកងនគរបាលជាតិ វរសេនាតូចការពារព្រំដែនលេខ៧៩៣ ទទួលបានអំណោយដ៏ថ្លៃថ្លា របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន ប្រធានកាកបាទក្រហមកម្ពុជា តាមរយៈដំណើរអញ្ជើញចុះសាកសួរសុខទុក្ខ របស់គណៈប្រតិភូសាលារាជធានីភ្នំពេញ ដឹកនាំដោយលោក ស៊ុយ សេរិទ្ធ អភិបាលរង តំណាងឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ។
ក្រោមកិច្ចទទួលស្វាគមន៍យ៉ាងកក់ក្ដៅពីសំណាក់ឧត្តមសេនីយ៍ឯក ស្រី ឌឹក មេបញ្ជាការរងកងទ័ពជើងគោក មេបញ្ជាការកងពលធំអន្តរាគមន៍លេខ៣ នាថ្ងៃទី២៣ ខែកញ្ញា ឆ្នាំ២០២១ ក្នុងពិធីអបអរសាទរបុណ្យកាន់បិណ្ឌ ភ្ជុំបិណ្ឌ ប្រពៃណីជាតិខ្មែរ។
ឧត្តមសេនីយ៍ឯក ស្រី ឌឹក មេបញ្ជាការង កងទ័ពជើងគោក មេបញ្ជាការកងពលធំអន្តរាគមន៍លេខ៣ ក៏ដូចជានាយ- ពលទាហាន សូមសំដែង នូវមនោសញ្ចេតនា រំភើបរីករាយឥតឧបមាជាទីបំផុត ចំពោះដំណើរសួរសុខទុក្ខ របស់គណៈប្រតិភូសាលារាជធានីភ្នំពេញ ដែលជាអង្គភាពសម្ព័ន្ធមេត្រីភាពមួយ តែងបានយកចិត្តទុកដាក់ រួមសុខរួមទុក្ខ គិតគូរពីទុក្ខលំបាករបស់បងប្អូននៅទីនេះ ជាប់ជាប្រចាំ ព្រមទាំងបានចូលរួមចំណែកជួយឧបត្ថម្ភគាំទ្រយ៉ាងច្រើនដល់អង្គភាពទាំងស្មារតី សម្ភារៈ ថវិកា សំរាប់កសាងអង្គភាព ក៏ដូចជាថវិកាជូនដល់ដៃបងប្អូនផ្ទាល់ជាដើម។ ឧត្តមសេនីយ៍ឯក ស្រី ឌឹកបានថ្លែងបញ្ជាក់ថា៖ កត្តាទាំងអស់នេះ គឺពិតជាបានស បញ្ជាក់អោយឃើញយ៉ាងច្បាស់ អំពីការអាណិតស្រឡាញ់ យកចិត្តទុកដាក់ រួមសុខ រួមទុក្ខ ផ្សារភ្ជាប់យ៉ាងជិតស្និទ្ធ រវាងសមរភូមិមុខ នឹងសមរភូមិក្រោយ។ រវាងមន្ត្រីរាជការស៊ីវិល ជាមួយកងកំលាំងប្រដាប់អាវុធគ្រប់ប្រភេទ ស្របតាមគោលនយោបាយ ដឹកនាំដ៏ត្រឹមត្រូវឈ្លាសវៃ ប៉ិនប្រសប់ របស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោហ៊ុន សែន ជាប្រមុខដឹកនាំដ៏ខ្ពង់ខ្ពស់បំផុត នៃយើងទាំងអស់គ្នា។
សូមបញ្ជាក់ថា៖ អំណោយដ៏ថ្លៃថ្លា របស់សម្តេចទាំងទ្វេ ដែលនាំមកឧបត្ថម្ភដល់អង្គភាពសម្ព័ន្ធមេត្រីភាព នៅក្នុងពិធីបុណ្យកាន់បិណ្ឌ ភ្ជុំបិណ្ឌនាពេលនោះ រួមមាន៖ ទឹកក្រូច២០០០កេស, មី២០០០កេស, ម៉ាស់ ២០៥,០០០ ម៉ាស់, អាល់កុល ១០០កាន ថវិកាសរុប ១០៥,២៦០.០០០៛, និងថវិកាចំនួន ៥៧,៧០០ដុល្លារ របស់រដ្ឋបាលរាជធានីភ្នំពេញ ឧបត្ថម្ភដល់អង្គភាពកងពលធំអន្តរាគមន៍លេខ៣ សម្រាប់សាងសង់រោងដាក់រថយន្តផងដែរ៕
