(ភ្នំពេញ)៖សមាគមអ្នកចិញ្ចឹមត្រី ឬសមាគមវារីវប្បករនៅកម្ពុជា នៅថ្ងៃទី១៤ ខែមិថុនា នេះ បានចេញសេចក្តីថ្លែងការណ៏មួយថ្កោលទោសបុគ្គលសសកម្មជនហ្វេសប៊ុកមួយរូបឈ្មោះ ខាន់ សុវណ្ណនិងបានហៅការលើកឡើងរបស់បុគ្គលរូបនោះថា ជាសម្តីបែបប្រមាថមើលងាយជាតិសាសន៍ខ្មែរ ជាសម្តីរើសអើង និងជាការនិយាយអត់មានមូលដ្ឋាន អត់មានការទទួលខុសត្រូវ និងមានចរឹកគួរឱ្យខ្ពើមរអើមបំផុត។
សមាគមអ្នកចិញ្ចឹមត្រីបានបញ្ជាក់នៅក្នុងសេចក្ដីថ្លងការណ៍របស់ខ្លួននារសៀលនេះថា “រយៈពេលពីរបីថ្ងៃកន្លងមកនេះ សាធារណៈជនខ្មែរជាច្រើន ក៏ដូចជាវារីវប្បករខ្មែរ បានប្រតិកម្ម យ៉ាងខ្លាំងចំពោះបុគ្គលឈ្មោះ ខាន់ សុវណ្ណ ដែលជាអ្នកលេងបណ្តាញសង្គមមួយរូប ខ្វះមនសិការ ដែលបាននិយាយដោយអគតិថា “ប្រជាពលរដ្ឋខ្មែរមិនចេះចិញ្ចឹមត្រី” នឹង ”ខ្លាចស្រុកខ្មែរអត់ត្រីស៊ី បើមិនមានអ្នកចិញ្ចឹមត្រីក្នុងបែរនៅក្នុងទន្លេទាំងនោះ”។
បើតាមសមាគមសមា “ការស្រែកនិយាយដោយកំហឹង អសុរស និងបញ្ចេញចរឹកច្រឡោងខាមបែបនេះ បានធ្វើឱ្យប៉ះពាល់យ៉ាងខ្លាំងដល់អារម្មណ៍ជនរួមជាតិខ្មែរ ប្រមុខរាជរដ្ឋាភិបាល និងក្រសួងស្ថាប័នពាក់ពន្ធ័ ដែលបាននឹងកំពុងខិតខំអភិវឌ្ឍន៍វារីវប្បកម្ម។ តាមពិតជាក់ស្តែង ប្រជាពលរដ្ឋខ្មែរចេះ ចិញ្ចឹមត្រីយូរយារណាស់មកហើយ”។
ជាមួយគ្នានោះ សមាគមវារីវប្បករនៅកម្ពុជា បានថ្កោលទោសយ៉ាងដាច់អហង្ការចំពោះបុគ្គល ខាន់ សុវណ្ណ និងបានអះអាងថា ភាសា និងសម្តីរបស់ឈ្មោះ ខាន់ សុវណ្ណ ជាសម្តីបែបប្រមាថមើលងាយដល់ជាតិសាសន៍ខ្មែរ ជាសម្តីរើសអើង ជាការនិយាយអត់មានមូលដ្ឋានច្បាស់លាស់ អត់មានការទទួលខុសត្រូវ មិនមានព័ត៌មានអោយគ្រប់ជ្រុងជ្រោយ និងមានចរឹកគួរឱ្យខ្ពើមរអើមបំផុត។ សមាគមវារីវប្បករនៅកម្ពុជា បានអំពាវនាវដល់ស្ថាប័នមានសមត្ថកិច្ច មេត្តាចាត់វិធានការណ៍ចំពោះបុគ្គលនេះ ហើយស្នើបុគ្គលឈ្មោះ ខាន់ សុវណ្ណ ត្រូវតែចេញមុខមកបំភ្លឺ និងសុំទោសជាសាធារណៈ ដោយមិនលើកលែងឡើយ។
សមាគមវារីវប្បករនៅកម្ពុជាបានអះអាងថា បច្ចុប្បន្នមានបងប្អូនវារីវប្បករ ដែលជាជនជាតិ ខ្មែររាប់ពាន់នាក់នៅទូទាំងប្រទេស កំពុងប្រកបមុខរបរក្នុងវិស័យវារីវប្បកកម្ម ប្រកបដោយបច្ចេកទេសត្រឹមត្រូវ មានសមត្ថភាពខ្ពស់ ផលិតបានផលជលផលច្រើនប្រភេទ ប្រកបដោយគុណភាពល្អ ហើយផលិតបានគ្រប់គ្រាន់សម្រាប់ផ្គត់ផ្គង់ទីផ្សារក្នុងស្រុកទៀតផង។
ថ្មីៗនេះ រដ្ឋបាលរាជធានីភ្នំពេញ បានចេញវិធានការណ៍ ឲ្យប្រជាពលរដ្ឋរស់នៅផ្ទៃទឹកតាមដងទន្លេ ដែលភាគច្រើនជាជនជាតិវៀតណាមរុះរើផ្ទះ បែរចិញ្ចឹមត្រី និងសំណង់មិនរាបរយផ្សេងៗចេញពីលើផ្ទៃទឹក ស្រាប់តែបុគ្គល ខាន់ សុវណ្ណ បាននិយាយឡាយក្នុងបណ្តាញសង្គមហ្វេសប៊ុក ដោយស្រែកក្តែងៗថា ពលរដ្ឋខ្មែរមិនចេះចិញ្ចឹមត្រី បើមិនមានអ្នកចិញ្ចឹមត្រីក្នុងបែរនៅក្នុងទន្លេ នឹងអត់ត្រីស៊ី៕
