សមត្ថកិច្ច៖ សូមម្ចាស់ហ្វេសបុកឈ្មោះ​ NaNa Anna ចូលខ្លួនមកបំភ្លឺនៅការិយាល័យនគរបាលបង្ការពន្លត់អគ្គិភ័យ​ និងសង្គ្រោះ​ នៃស្នងការនគរបាលរាជធានីភ្នំពេញ​ ជាបន្ទាន់ បើពុំដូច្នោះទេកងកម្លាំងសមត្ថកិច្ចនគរបាល និងចាត់វិធានការតាមផ្លូវច្បាប់

(ភ្នំពេញ)៖ សេចក្តីបកស្រាយបំភ្លឺ និងបដិសេធរបស់ក្រុមការងារព័ត៌មាន និងប្រតិកម្មរហ័ស​របស់ការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ លើករណីដែលហ្វេសបុកមួយឈ្មោះថា NaNa Anna ដែលបានសរសេរថា (ឡានទឹកចចារអត់ត្រូវមែន) ដែលជាករណីអគ្គិភ័យខាងលេីនេះ​ កេីតឡេីងនៅតាមបណ្តោយផ្លូវណតប្រ៊ិត ក្នុងភូមិទ្រុងមាន់សង្កាត់អូបែកក្អម ខណ្ឌសែនសុខ​​ រាជធានីភ្នំពេញ​ នាថ្ងៃទី២៩ ខែមករា ឆ្នាំ​២០២២នេះ។

ការិយាល័យនគរបាលបង្ការពន្លត់អគ្គិភ័យ និងសង្គ្រោះ សូមធ្វើការបកស្រាយបំភ្លឺ និងបដិសេធចំពោះហ្វេសបុក​ NaNa Anna ដែលបានសរសេរបែបនេះ​ ​និងធ្វេីឲ្យប្រជាពលរដ្ឋមានការយល់ច្រឡំមកលេីកងកម្លាំងសមត្ថកិច្ច​ ដែលបានចុះប្រតិបត្តិការអន្តរាគមន៍ជួយសង្គ្រោះប្រជាពលរដ្ឋ​ ជាពិសេសមានបំណងអាក្រក់បំពុលបរិយាកាសដល់សង្គមជាតិ។

សូមបញ្ជាក់ជូនបងប្អូនប្រជាពលរដ្ឋឲ្យបានជ្រាបថា​ ករណីអគ្គិភ័យកាលពីយប់មិញនេះ​ ដោយសារតែស្ថានភាពនៅទីតាំងកើតហេតុ មិនទាន់បានបិទចរន្តអគ្គីសនី ទើបខាងការិយាល័យរបស់យើងមិនអាចធ្វើការបាញ់ពន្លត់បាន។

សូមម្ចាស់ហ្វេសបុកឈ្មោះ​ NaNa Anna ខាងលេីនេះ ចូលខ្លួនមកបំភ្លឺនៅការិយាល័យនគរបាលបង្ការពន្លត់អគ្គិភ័យ​ និងសង្គ្រោះ​ នៃស្នងការនគរបាលរាជធានីភ្នំពេញ​ ជាបន្ទាន់ បើពុំដូច្នោះទេកងកម្លាំងសមត្ថកិច្ចនគរបាលយេីង​ និងចាត់វិធានការតាមផ្លូវច្បាប់ផងដែរ៕