(ខេត្តកំពត)៖ ឆ្នាំនេះគេកត់សម្គាល់ឃើញអ្នកទេសចរមកពីគ្រប់បណ្តាខេត្ត សម្រុកចូលមកសម្រាក លម្ហែ កម្សាន្ត នៅតាមរមណីយដ្ឋាននានានៃភូមិសាស្ត្រខេត្តកំពត យ៉ាងភ្លូកទឹកភ្លូកដី ដែលធ្វើឱ្យដងផ្លូវសំខាន់ៗក្នុងទីរួមខេត្តកកកុញដោយយានជំនិះគ្រប់ប្រភេទ។ទោះជាបែបនេះក្តីតាមដងផ្លូវក្នុងក្រុងកំពត មិនបានការកកស្ទះនោះទេ ដោយសារការខិតខំប្រឹងប្រែងពីសំណាក់សមត្ថកិច្ចសម្រួលចរាចរនៅគ្រប់ដងផ្លូវ។ លោក សយ ស៊ីណុល ប្រធានមន្ទីរទេសចរណ៍ខេត្តកំពត បានឱ្យដឹងថា រយៈពេលបីថ្ងៃនៃការឈប់សម្រាកក្នុងព្រះរាជពិធីបុណ្យអុំទូក អកអំបុក សំពះព្រះខែ និងបណ្តែតប្រទីប ក្នុងឆ្នាំ២០២១នេះ ខេត្តកំពតមានភ្ញៀវទេសចរណ៍បានមកសម្រាកកម្សាន្តចំនួន ៨៣.៤៦៦នាក់ កើនឡើង ៧០,៦១ភាគរយ ធៀបនឹងរយៈពេលដូចគ្នាក្នុងឆ្នាំ២០២០ ក្នុងនោះភ្ញៀវទេសចរជាតិមានចំនួន ៨២.២១១នាក់ កើនឡើង ៧១,៣១ភាគរយ ភ្ញៀវបរទេសមានចំនួន ២៥៥នាក់ ថយចុះ ២៦,៣០ភាគរយ។ លោកប្រធានមន្ទីរបានបន្ថែមថា ក្នុងរយៈពេល៣ថ្ងៃនេះក្រុមការងារនៃមន្ទីរទេសចរណ៍ខេត្ត បានបែងចែកជា ៤ក្រុម ដើម្បីចុះសហការជាមួយមន្ទីរ អង្គភាព អាជ្ញាធរពាក់ព័ន្ធដើម្បីពង្រឹងការអនុវត្តសុវត្តិភាពទេសចរណ៍ SOP តាមការណែនាំរបស់ក្រសួងទេសចរណ៍ ក៏ដូចជាវិធានសុវត្តិភាពផ្សេងៗដែលបានដាក់ចេញដោយក្រសួងសុខាភិបាល និងប្រមុខរាជរដ្ឋាភិបាល។ ជាមួយគ្នានេះដែរតាមការអង្កេតប្រតិបត្តិករទេសចរ អាជីវករ មានការខិតខំសហការចូលរួមអនុវត្តវិធានសុវត្តិភាពទេសចរណ៍បានយ៉ាងល្អប្រសើរ។ ចំណែកភ្ញៀវទេសចរណ៍ជាទូទៅស្ទើរ ១០០% បានយកប័ណ្ណចាក់វ៉ាក់សាំងតាមខ្លួន និងចូលរួមអនុវត្តវិធាន ៣កុំ៣ការពារ ពិសេសការពាក់ម៉ាស ប្រើអាល់កុល ជែលលាងសំអាតដៃ […]
