(ខេត្ដកំពង់ចាម)៖ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានរៀបចំសាងសង់វិមានឯករាជ្យ ស្ថិតនៅក្នុង ភូមិទី៦ សង្កាត់វាលវង់ ក្រុងកំពង់ចាម ដើម្បីទុកជាសម្បត្ដិវប្បធម៌ទេសចរណ៍ប្រវត្តិសាស្ត្រ ។
ក្នុងដំណើរអញ្ជើញចុះពិនិត្យទីតាំងសម្រាប់សាងសង់វិមានឯករាជ្យ នាព្រឹកថ្ងៃទី ១៦ ខែវិច្ឆិកា ឆ្នាំ២០២១នេះ ឯកឧត្តម អ៊ុន ចាន់ដា អភិបាលខេត្តកំពង់ចាម បានថ្លែងថា ការរៀបចំសាងសង់វិមានឯករាជ្យនេះ អាជ្ញាធរខេត្តមានបំណងទុកជាសម្បត្តិវប្បធម៌ទេសចរណ៍ ប្រវត្តិសាស្ត្រ និងលេីកកម្ពស់សោភ័ណ្ឌភាពទីក្រុង សំដៅទៅលើ ខួបកំណើតនៃកងយុទ្ធពលខេមរភូមិន ដែលជាស្នាមព្រហស្ថ របស់ ព្រះរមរតនកោដ្ឋ ព្រះបាទ នរោត្ដម សីហនុ ដែលព្រះអង្គបានដណ្ដើមឯករាជ្យ ពីអាណានិគមបារាំង នៅថ្ងៃទី៩ ខែវិច្ឆិកា ឆ្នាំ១៩៥៣ ។
បើតាម លោកចាន់ ផល្លី អភិបាលក្រុងកំពង់ចាម បានបញ្ជាក់ថា ទីតាំងដែលឯកឧត្តមអភិបាលខេត្ត សម្រេចសាងសង់វិមានឯករាជ្យនេះ គឺនៅចំណុចផ្លូវកៅស៊ូមាត់ច្រកចូលទៅសាលាគរុកោសល្យខេត្តកំពង់ចាម ដោយចំណុចនេះ ឯកឧត្តមអភិបាលខេត្ត បានណែនាំឲ្យមន្ត្រីជំនាញពាក់ព័ន្ធ សាងសង់ពង្រីកផ្លូវជាតិឲ្យបានធំទូលាយ ចាប់ពីចំណុចនាគព័ន្ធ រហូតមកដល់ចំណុចទន្លេអុំ ដើម្បីបង្កើនសោភ័ណភាព នៃចំណុចវិមានឯករាជ្យ ឲ្យក្លាយទៅជាកន្លែងទេសចរណ៍ សម្រាប់ប្រជាពលរដ្ឋ មកកម្សាន្តផងដែរ ។
លោក ចាន់ ផល្លី បានបញ្ជាក់ទៀតថា វិមានឯករាជ្យនេះ ឯកឧត្តមអភិបាលខេត្ត តម្រូវឲ្យជាងសាងសង់រួចរាល់ មុនថ្ងៃទី៩ ខែវិច្ឆិកាឆ្នាំ ២០២២ ៕
