ភ្នំពេញ ៖ កាលពីយប់ ថ្ងៃទី២៤ ខែកក្កដា ឆ្នាំ២០២១ ស្ថិតនៅក្រោយក្លិបប្លូរឡាញ តាមបណ្តោយផ្លូវលេខ២៧១ ក្រុម១ ភូមិសន្សំកុសល៥ សង្កាត់បឹងទំពុនទី១ ខណ្ឌមានជ័យ រាជធានីភ្នំពេញ មានករណីគ្រោះអគ្គិភ័យនេះបានបំផ្លាញ ឃ្លាំងសង់ពីថ្មបេតុងប្រក់ស័ង្កសី ដែលមានទំហំ៣០ម៉ែត្រគុណនឹង៨០ម៉ែត្រដែលនៅក្នុងនោះមានស្តុកទំនិញគ្រប់មុខត្រូវបានភ្លើងឆេះអស់ទាំងស្រុង តែពុំបណ្តាលឲ្យឆេះ រាលដាលដល់ផ្ទះអ្នកជិតខាងឡើយ។
លោកវរសេនីយ៍ឯក ព្រហ្ម យ៉ន នាយការិយាល័យបង្ការពន្លត់អគ្គិភ័យ និងសង្គ្រោះ នៃស្នង ការដ្ឋាននគរបាលរាជធានីភ្នំពេញ បានប្រាប់ឱ្យដឹងថា ម្ចាស់ឃ្លាំងគឺលោកឧកញ៉ា សូ ងួន មូលហេតុនៃការឆាបឆេះ កំពុងតែធ្វើការស្រាវជ្រាវ។
សមត្ថកិច្ចបានប្រើប្រាស់រថយន្ដការិយាល័យបង្ការ និងពន្លត់អគ្គិភ័យ ចំនួន២១គ្រឿង ដោយប្រើប្រាស់ទឹកអស់ ១២៦ឡាន ស្មើ៨៤៦ ម៉ែត្រគូប ក្នុងនោះមានការចូលរួមពីរថយន្តពន្លត់អគ្គិភ័យក្រសួងមហាផ្ទៃចំនួន២គ្រឿង ប្រើប្រាស់ទឹកអស់២ឡាន ស្មើ៨ម៉ែត្រគូប, រថយន្តពន្លត់អគ្គិភ័យក្រុមហ៊ុន OCIC ទីក្រុងជ្រោយចង្វាចំនួន៧គ្រឿង ប្រើប្រាស់ទឹកអស់២១ឡាន ស្មើ១២៦ម៉ែត្រគូប, រថយន្តពន្លត់អគ្គិភ័យទីក្រុងអូឡាំព្យ៉ាចំនួន ២គ្រឿង ប្រើប្រាស់ទឹកអស់២ឡានស្មើ៨ម៉ែត្រគូប, រថយន្តពន្លត់អគ្គិភ័យក្រុមហ៊ុនស្រាបៀរកម្ពុជាចំនួន១គ្រឿង ប្រើប្រាស់ទឹកអស់៥ឡាន ស្មើ៣០ម៉ែត្រគូប ទើបរលត់ទាំងស្រុង នៅវេលាម៉ោង ២និង០០នាទីរំលងអធ្រាត្រឈានចូល ថ្ងៃទី២៥ ខែកក្កដា ឆ្នាំ២០២១៕
