(ភ្នំពេញ)៖កម្លាំងនគរបាលប៉ុស្តិ៍ស្ទឹងមានជ័យទី១បានចាប់ជនសង្ស័យម្នាក់ ករណីលួចកាត់យកខ្សែភ្លើងតាមបង្គោលបំភ្លឺផ្លូវនៅម្តុំក្រោមស្ពានអាកាសស្ទឹងមានជ័យ ផ្លូវលេខ២៧១ ភូមិមានជ័យ១ ខណ្ឌមានជ័យ កាលពីទៀបភ្លឺចូលថ្ងៃទី៤ ខែកក្កដា ឆ្នាំ២០២១។
សមត្ថកិច្ចបានឱ្យដឹងថា៖ជនសង្ស័យឈ្មោះ ឆៃលី សម្បត្តិភេទប្រុស អាយុ២៤ឆ្នាំមានផ្ទុកសារធាតុញៀន។នគរបាលរដ្ឋបាលពេលល្បាតក្នុងមូលដ្ឋានបានឃើញជនសង្ស័យ កំពុងយកដង្កាប់ទៅកាត់ខ្សែភ្លើង ដែលតភ្ជាប់ទៅផ្ទាំងប៉ាណូ និងបង្គោលភ្លើងបំភ្លឺតាមផ្លូវក៏ចាប់យកមកប៉ុស្តិ៍រដ្ឋបាលតែម្តង។
វត្ថុតាងចាប់បាន៖ ដង្កាប់ចំនួន២ដើមនិងខ្សែភ្លើងកាត់ផ្តាច់ជាកំណាត់ៗ មួយចំនួន។បច្ចុប្បន្នជនសង្ស័យបានឃាត់ខ្លួននៅអធិការដ្ឋាននគរបាលដើម្បីកសាងសំណុំរឿងចាត់ការបន្ត៕
