ជនសង្ស័យមួយក្រុមធ្វើសកម្មភាពឆក់កាបូបពីស្ត្រីម្នាក់បានសម្រេចគេចខ្លួនបាត់តែបន្សល់ទុកនៅម៉ូតូ

(ភ្នំពេញ )៖ ស្ត្រីម្នាក់ត្រូវបានចោរមួយក្រុម បានធ្វើសកម្មភាពឆក់យកកាបូបលុយ សរុបជាង៣០០ដុល្លារ យកទៅបាត់ តែក្រុមជនសង្ស័យបានបន្សល់ទុកនៅម៉ូតូមួយគ្រឿង នៅកន្លែងកើតហេតុ។

ហេតុការណ៏នេះបង្កឲ្យមានការភ្ញាក់ផ្អើលឡើង នៅម៉ោង១០និង១៥នាទីព្រឹក ថ្ងៃទី១១ ខែមិថុនា ឆ្នាំ២០២១ ស្ថិតនៅតាមបណ្តោយផ្លូវឌួងងៀប ភូមិចុងថ្នល់ខាងលិច សង្កាត់អូរបែកក្អម ខណ្ឌសែនសុខ រាជធានីភ្នំពេញ។

បើតាមសម្តីជនរងគ្រោះបានឲ្យដឹងថា មុនពេលកើតហេតុ រូបគាត់បានជិះម៉ូតូមួយគ្រឿង ចេញពីផ្ទះបម្រុងទៅទិញម្ហូប ខណៈមកដល់ចំណុចកើតហេតុហើយផ្លូវស្ងាត់ផងនោះ ស្រាប់តែមានជនសង្ស័យមួយក្រុម មានគ្នាប្រហែល៤នាក់ បានជិះម៉ូតូចេញមកធ្វើសកម្មឆក់ យកកាបូបលុយពីរូបគាត់ ភ្លាមៗនោះរូបគាត់ក៏បានស្រែកឆោឡោ ឲ្យគេជួយទើបក្រុមជនសង្ស័យភ័យ រត់ចោលទុកម៉ូតូមួយគ្រឿង នៅកន្លែងកើតហេតុតែម្តង។

សមត្ថកិច្ចបានឲ្យដឹងថា ម៉ូតូដែលក្រុមជនសង្ស័យទុកចោលនៅកន្លែងកើតហេតុម៉ាកហុងដា BEAT ពណ៌សលាយខៀវពាក់ស្លាកលេខ ភ្នំពេញ 1BC-8917 ។

បន្ទាប់ពីកើតហេតុ សមត្ថកិច្ចបាននាំជនរងគ្រោះ មកដាក់ពាក្យបណ្តឹង នៅប៉ុស្តិ៍នគរបាលរដ្ឋបាលសង្កាត់អូរបែកក្អម និងធ្វើកំណត់ហេតុ ដើម្បីស្រាវជ្រាវស្វែងរកឃាត់ខ្លួនជនសង្ស័យ ផ្តន្ទាទោសតាមផ្លូវច្បាប់ នៅពេលក្រោយ៕