ភ្នំពេញ៖ ឧកញ៉ា គិត ធាង ម្ចាស់ក្លឹបមជ្ឈមណ្ឌល កម្សាន្តរ៉ក ដែលជាប់ចោទក្នុងសំណុំរឿងគ្រឿងញៀនជិត៥០គីឡូក្រាមនោះ
ត្រូវបានសាលាឧទ្ធរណ៍ សម្រេចដោះលែងដោយមានសេរីភាពវិញហើយក្រោយពីលោក ជាប់ពន្ទនាគារ អស់រយះពេលប្រមាណជា ជាង២ឆ្នាំរួចមក ។ចំណែកអ្នកពាក់ពន្ធ័ ប្រមាណជិត ៣០នាក់ផ្សេងទៀត មិនត្រូវបានដោះលែងនោះទេ។នេះបើយោងតាមការផ្សាយ របស់គេហទំព័រ ភ្នំពេញ ថែម ផ្សាយនៅព្រឹកថ្ងៃទី១៥ ឧសភានេះ ។
ប្រភពដដែលបានផ្សាយបន្តថា ឧកញ៉ា គិត ធាង ត្រូវបានសាលាដំបូងរាជធានីភ្នំពេញ សម្រេចផ្ដន្ទាទោសឲ្យលោកជាប់ពន្ធនាគាររយៈពេល៤ឆ្នាំ ពីបទចាត់ចែងសម្របសម្រួលឲ្យប្រើប្រាស់សារធាតុញៀនខុសច្បាប់ និងសមគំនិត ពាក់ព័ន្ធករណីគ្រឿងញៀនជិត៥០ (៤៩,៤៤) គីឡូក្រាម នៅក្នុងក្លឹបកម្សាន្តរបស់ខ្លួននោះ ។
ប្រភពដែលគួរឲ្យទុកចិត្ត បានទម្លាយនៅថ្ងៃទី១៤ ឧសភាថា កាលពីសប្តាហ៏ មុន សាលាឧទ្ធរណ៍ បានសម្រេចកាត់ទោសតម្រឹមដោយឲ្យលោក គិត ធាង អនុវត្តទោសរយៈពេលតែ២ឆ្នាំប៉ុណ្ណោះ ចំណែកទោសនៅសល់ ត្រូវព្យួរជាធម្មតា។ ចំណែក សម្រាប់ជនជាប់ចោទប្រមាណជិត ៣០នាក់ផ្សេងទៀត ដែលជាប់ពាក់ព័ន្ធក្នុងសំណុំរឿងជាមួយលោក គិត ធាង ដែរនោះ មិនត្រូវបានដោះលែងនោះទេ។
លោក ជូ ប៊ុនរីន អ្នកនាំពាក្យសាលាឧទ្ធរណ៍មិនអាចសុំការបំភ្លឺបានទេ។
សូមបញ្ជាក់ថា សមត្ថកិច្ច បានចាប់ឃុំខ្លួនលោក គិត ធាង កាលពីថ្ងៃទី១១ ខែមីនា ឆ្នាំ២០១៩។ បន្ទាប់មក កាលពីថ្ងៃទី២០ ខែមីនា ឆ្នាំ២០២០ សាលាដំបូងរាជធានីភ្នំពេញ បានសម្រេចផ្ដន្ទាទោសឲ្យលោក គិត ធាង ជាប់ពន្ធនាគាររយៈពេល៤ឆ្នាំ ពីបទចាត់ចែងសម្របសម្រួលឲ្យប្រើប្រាស់សារធាតុញៀនខុសច្បាប់ និងសមគំនិតពាក់ព័ន្ធ ករណីគ្រឿងញៀនជិត៥០ (៤៩,៤៤)គីឡូក្រាម។ ក្រោយពី សមត្ថកិច្ចឆ្មក់ចូលបង្ក្រាបបាននៅក្នុងមជ្ឈមណ្ឌលកម្សាន្តរ៉ក់ រកឃើញ មនុស្សម្នា ប្រមាណជា៣០០នាក់ នៅក្នុងមនោះ ។
ប្រភព ៖ ភ្នំពេញ ថែម
