(ខេត្ដកំពង់ចាម)៖ ឯកឧត្តម អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងនឹងជំងឺកូវីដ-១៩ អមដំណើរដោយមន្ត្រីពាក់ព័ន្ធ នាព្រឹកថ្ងៃទី២០ ខែឧសភា ឆ្នាំ២០២១នេះ បានអញ្ជើញចុះពិនិត្យការពង្រីកបន្ថែមមណ្ឌលចត្តាឡីស័ក របស់រដ្ឋបាលរដ្ឋបាលស្រុកជេីងព្រៃ និងស្រុកបាធាយ ខណៈករណីវិជ្ជមានកូវីដ-១៩ និងអ្នកពាក់ព័ន្ធបានកេីនឡេីងជាបន្តបន្ទាប់ គួរឲ្យព្រួយបារម្ភ ។
ឯកឧត្តម អ៊ុន ចាន់ដា អភិបាលខេត្តកំពង់ចាម បានណែនាំ និងដាក់ចេញនូវយុទ្ធសាស្ត្រ ឲ្យមន្ត្រីពាក់ព័ន្ធ ធ្វេីយ៉ាងណាត្រូវបង្រួម និងទប់ស្កាត់កុំឲ្យមានករណីវិជ្ជមានកូវីដ-១៩ រីកឆ្លងបន្ត ដោយត្រូវរៀបចំមណ្ឌលចក្តាឡឺស័ក ហើយប្រមូលអ្នកដែលប៉ះពាល់ដោយផ្ទាល់ទាំងអស់ ឲ្យចត្តាឡីស័ក ឲ្យបានត្រឹមត្រូវស្របទៅតាមការណែនាំរបស់រាជរដ្ឋាភិបាល ក៏ដូចជាក្រសួងសុខាភិបាល ដោយមានក្រុមគ្រូពេទ្យពិនិត្យតាមដានសុខភាពនៅតាមមណ្ឌលនីមួយៗ ផងដែរ ។
គួរបញ្ជាក់ថា ក្រោយពីរកឃើញករណីវិជ្ជមានកូវីដ-១៩ ជាបន្តបន្ទាប់ ជាក់ស្ដែងគិតត្រឹមថ្ងៃទី២០ ខែឧសភា ឆ្នាំ២០២១នេះ រដ្ឋបាលខេត្តកំពង់ចាមបានចេញសេចក្ដីជូនដំណឹងស្តីពីករណីរកឃើញវិជ្ជមានកូវីដ-១៩ ចំនួន ៥២នាក់ ក្នុងនោះ កម្មការិនី ចំនួន ៥១នាក់ (ស្រុកបាធាយ ០៩នាក់, ស្រុកជើងព្រៃ ២៨នាក់ ស្រុកព្រៃឈរ ១២នាក់ មកពីខេត្តកំពង់ធំ ០១នាក់ និងខេត្តកណ្តាល ០១នាក់) និងម្តាយអ្នកជំងឺកូវីដ-១៩ ស្រុកកងមាស ០១នាក់ សរុប ៣០៧នាក់ ដែលបានសម្រាកព្យាបាលនៅមន្ទីរពេទ្យមេគង្គកំពង់ចាម ក្នុងនោះក៏មានអ្នកជាសះស្បើយបានត្រឡប់ទៅផ្ទះវិញប្រមាណជាង ១០០នាក់ ។
ចំពោះករណីនេះ រដ្ឋបាលស្រុកជេីងព្រៃបានកំណត់យក វិទ្យាល័យ ហ៊ុន សែន ស្គន់ សម្រាប់ធ្វើជាមណ្ឌលចាត្តាឡីស័ក ដោយឡែករដ្ឋបាលស្រុកបាធាយបានយកវិទ្យាលយ័ហោ ណាំហុងព្រៃញា ស្ថិតក្នុងភូមិព្រៃញា ឃុំផ្អាវ សម្រាប់ធ្វេីជាមណ្ឌលចត្តាឡីសក័ ។
ជាមួយគ្នានោះ ឯកឧត្តមអភិបាលខេត្ត ក៏បានអញ្ជើញចុះពិនិត្យស្ថានភាព រោងចក្រ ជូហួយ ហ្វូតវែ ដែលមានកម្មករកម្មការិនីផ្ទុកវិជ្ជមានកូវីដ-១៩ រួមនឹងអ្នកពាក់ព័ន្ធដោយផ្ទាល់ និងប្រយោលជាច្រើននាក់ ស្ថិតនៅក្នុងឃុំខ្នុរដំបង ស្រុកជើងព្រៃ ដេីម្បីដាក់ចេញនូវវិធានការទប់ស្កាត់ការឆ្លងរីករាលដាលនៃជំងឺកូវីដ-១៩ នេះផងដែរ ៕
